SAN FERNANDO CITY – Karigat ti biag ket iti sanguanan ti panagbisin, napanunot daytoy a lalaki ti nagtakaw iti tinapay manipud iti maysa a panaderia sadiay Barangay Uno ditoy siudad idi Enero 30.
Tiniliw dagiti polis ni Julio Manaois, 56, residente iti Barangay Mameltac ditoy siudad bayat ti akto a panangitarayna iti tinapay nga inlimedna nga innala iti maysa a bakery a masarakan iti nadakamat a barangay.
Segun iti report, aglibas koma ni Manaois a naglugan iti bisikletana ngem nasiputan ti tindera ket nagpaarayat kadagiti polis a mangiwanwanwan iti trapiko iti dayta a kanito.
Kinamat dagiti polis ni Manaois agingga iti naipiskot ti suspek sada impan iti presinto.
Naala iti ikut ti suspek ti dua a bungon ti loaf bread.#