Lalaki, natiliw gapu iti panagikutna iti paltog

CAOAYAN, Ilocos Sur – Tiniliw dagiti polis ti maysa a baro a nasalamaanda nga adda iggemna a paltog sumagmamano a minutos sakbay ti isasangbay ti baro a tawen.

Nabigbig ti suspek a ni Jayson Bayle y Butay, 23, baro, ken residente iti Barangay Anonang Mayor ditoy nga ili.

Segun iti report, nagresponde dagiti polis kalpasan a nakaawatda iti report nga adda agriringgor iti nadakamat a barangay idi agarup 11:45 ti rabii ti Disiembre 31.

Bayat ti panangpatalna dagiti polis kada Zaldy Butay ken Jessie Querreza, agpada a lumugar iti nasao a barangay, nakitada ni Bayle a naggapu iti nasipnget a paset ti likudan ti balayda a nakaiggem iti maysa a homemade buckshot gauge 12 nga addaan iti maysa a bala.

Kinumpiska dagiti polis ti paltog sada inkuyog ni Bayle iti police station para iti umisu a disposision.

Saan a nailanad iti blotter no apay a nakaiggem ni Bayle ti paltog ken no adda pakainaiganna iti panagringgor da Butay ken Querreza.#