Lalaki, natiliw iti buy-bust operation

CABUGAO, Ilocos Sur – Inaresto dagiti polis ti maysa a lalaki iti insayangkatda a buy-bust operation iti Barangay Bonifacio ditoy nga ili idi malem ti Hulio 5.

Naipan iti police station ti suspek a ni Nicolas Seguirre y Bernalez, 40, naasawaan, ken residente iti nadakamat a barangay para iti naing-inget a pannakapalutpotna.

Segun iti report, nagpammarang a kustomer ti maysa a kameng ti nagtipon nga elemento ti PDEA a nakabase iti Candon City ken dagiti polis ditoy ket gimmatang ken ni Seguirre iti maysa a heat sealed a plastic sachet a mapapati a naglaon iti shabu.

Inaresto dagiti polis ti suspek apaman a naginnallawatda iti poseur-buyer iti kuarta ken droga a mapattapatta nga agdagsen iti .01 gramo.

Nakumpiska dagiti polis  iti bulsa ti suspek ti maysa a P500 bill.#