Lalaki, natiliwan iti akto nga agtakaw

STA. LUCIA, Ilocos Sur – Nakasuan ti maysa a lalaki kalpasan a nasukalan iti akto a kurimesenna ti naglakuan ti maysa a negosiante iti mismo a paglakuan daytoy iti tiendaan publiko idi Hunio 28.

Segun iti report manipud iti polis ditoy, bayat ti panangtaming ni Auria Benitez y Valdez, 60, meat vendor, ken residente iti Barangay Bao-as, Sta. Lucia, Ilocos Sur iti maysa a kustomer, inasitgan ti suspek a nainaganan Johnny Agulan y Collado, 49, naasawaan, ken residente iti Casantaan, Sto. Tomas, La Union, ti cash box ket kinurimesna ti kuarta a naggian ditoy ngem nasiputan ti baket ket nagpukkaw a nagpaarayat.

Naglibas ti suspek ngem naipiskot dagiti kimmamat a tattao.#