Lalaki, natiliwan nga agikut paltog iti natayan

STO. DOMINGO,Ilocos Sur- Maysa a lalaki ti natiliwan nga adda sakibotna a paltog iti maysa a natayan iti Barangay Cagayungan ditoy nga ili itay nabiit.

Naammuan iti report a madama ti panagpatrolia dagiti polis nga indauluan ni COP Police Captain Arsenio Ramos idi makaawatda iti text message a maysa a lalaki ti nakita nga adda ikutna a paltog iti lamayan iti barangayda.

Nagresponde dagiti polis ket nakakumpiskada iti cal. 38 nga addaan iti maysa a bala manipud ken ni Mariano Mariñas, 49, taga-Cagayungan Narvacan ngem agnaed iti agdama iti Barangay Cagayungan ditoy.

Iti pannakaisurat daytoy, maisagsaganan ti kaso maikontra ken ni Mariñas.#