Lalaki nga umin-inom iti videoke bar, napaltogan

STA. MARIA, Ilocos Sur – Maysa a lalaki ti ginandat a gudasen dagiti armado a lallaki a riding in tandem iti maysa a videoke bar iti tiendaan ditoy nga ili idi sardam ti Nobiembre 5.

Naitaray iti Reyes Clinic and Hospital sa naiyalis iti St. James Hospital iti Vigan City ni Felipe Collo y Soliven aka “Lucio”, 47, naasawaan, residente iti Barangay Orence, Narvacan, Ilocos Sur ngem agdama nga agnaed iti Barangay Silag, ditoy nga ili gapu kadagiti sinagrapna a sugatna.

Nabigbig ti pimmaltog kenkuana a ni Michael de Gracia, residente met laeng iti Barangay Silag ditoy nga ili. Saan a nainaganan ti nagmaneho iti motorsiklo a nagluganan dagiti suspek.

Iti inisial nga inbestigasion dagiti polis, naammuan a madama ti drinking spree ti biktima iti Mel & Del Videoke Bar a masarakan iti Barangay Maynganay, ditoy nga ili idi nagsardeng ti motorsiklo a nagluganan ni de Gracia ket pinaltoganna ni Collo iti sumagmamano a daras a naglak-aman ti biktima kadagiti sugat iti nadumaduma a paset ti bagina.

Naglibas dagiti suspek a nakalugan met laeng iti motorsikloda iti laud a direksion.

Nakarekobre dagiti nagresponde a polis iti lima a kapsula ken 4 a deformed nga slugs iti nakapasamakan ti pammaltog.

Di pay ammo ti motibo ti pammaltog.

Kabayatanna, pinaputokan dagiti di pay nabigbig a tattao ti balay ti maysa a residente iti Barangay San Vicente, Magsingal, Ilocos Sur idi agsapa ti Nobiembre 5.

Segun iti report a naggapu iti police station ti nasao nga ili, napaputokan iti namitlo ti pagtaengan ni George Viloria y Agatep, 48, naasawaan, awanan panggedan, ken residente iti nadakamat a barangay idi agarup 5:30 ti bigat ti nasao a petsa.

Iti panagimbestiga dagiti polis, naduktalan a namindua a napuntaan ti steel window iti akimbaba a kadsaaran.

Saan pay nga ammo no ania a klase a paltog ti naggapuan dagiti nasarakan dagiti polis a napitpit a buli iti nakapasamakan ti insidente.

Saan pay met nga ammo no ania ti motibo ti pammaltog.#