SINAIT, Ilocos Sur – Pinaltogan ti dua a tattao a naglugan iti motorsiklo ti maysa a residente ti Barangay Pug-os ditoy itay nabiit.
Nadundunor ni Jerry Rabena, 51, residente iti nadakamat a barangay kalpasan ti panangpaltog kenkuana dagiti di pay am-ammo a tattao a nakalugan iti motorsiklo idi Mayo 2.
Kalibre 45 ti nausar iti pammaltog, maibasar iti kapsula ken buli a nasarakan iti nakapasamakan ti pammaltog.
Naitaray ti bikima iti Corpuz Clinic and Hospital sa naiyalis iti Metro Vigan Cooperative Hospital.
Di pay ammo ti motibo ti pammaltog.#