Lalaki, pinaputokanna dagiti kagawad ken tanod

STA. MARIA, Ilocos Sur — Maysa a lalaki a mapapati a nakainom ti nagpaputok kadagiti opisial ken tanod ti barangayda idi rabii ti Abril 29, daytoy a tawen.

Base iti report ti PNP, nagresponde dagiti opisial ti Brgy. Poblacion Norte, daytoy nga ili, tapno aganawa iti riri dagiti dua a lallaki. Bayat iti panaganawada, nakibiang ti suspek nga agnagan Ulysses Primitivo Agatep, 36, awanan trabaho, residente iti nasao a brgy, ken gayyem ti maysa kadagiti agaapa, ket ginandatna a bekkelen ti kaapa ti gayyemna ngem inanawa dagiti kagawad.

Simrek ni Agatep iti balayda, ngem idi pumanawen dagiti opisial, bigla a rimuar ni Agatep ket pinaputukanna iti Cal. 22 a paltog dagiti kagawad ken tanod.

Awan ti natamaan kadagiti opisial ti barangay. Dagus a timmaray ti suspek kalpasan ti pammaltog.

Saan a panagkikinnaawatan ken nakaro a pannakabartek ti gapu ti riri.