Lalaki a sumangsango iti 3 kaso, naarestar

SINAIT, Ilocos Sur – Inaresto dagiti nagtipon nga elemento ti Lipa City Police Station, Batangas ken police station ditoy ti maysa a residente iti Barangay Tapao ditoy nga ili a sumangsango iti tallo a kaso idi bigat ti Oktubre 7.

Indauluan da SPO4 Nestor R. Balita ken Police Inspector Danilo Valoria, DCOP, dagiti polis ti Lipa City ken ken Sinait a nangaresto ken ni Julius Yago y Gonzales, 40, naasawaan, ken residente iti nadakamat a lugar.

Sumangsango ni Yago iti kaso a child abuse a nai-docket iti CC No. 0573-2010 nga addaan piansa a P80,000.00; panagsalungasing iti Comprehensive Dangerous Drugs Act 2002 and Illegal Possession of Explosive  a nai-docket iti babaen ti CC Nos. 0030-2011 ken  0031–2011 nga addaan piansa a P200,000.00 ken illegal possession of explosive a nai-docket babaen ti  CC No. 2011-0023 a saan a mapiansaan.

Imet dagiti polis idi napanda inaresto ni Yago ti warrant of arrest nga inyisio ni Judge Danilo Sandoval, presiding judge ti RTC Branch 12, Lipa City  ken ni Judge Renato Castillo, presiding judge ti MTCC, Forth Judicial Region Branch 1.

Naglasat iti dokumentasion ti suspek sa naipaima kadagiti polis ti Lipa City para iti disposision ken pannakaikustodiana.#