Lalaki a sumangsango iti carnapping, naaresto

VIGAN CITY – Inaresto dagiti polis ti maysa a lalaki nga akusado iti panagkarnap babaen ti bileg ti arrest warrant nga inyisio ti hues  ti maysa a korte ditoy.

Inaresto dagiti polis-Vigan nga indauluan ni Supt. Maximo A. Taclas, OIC, ni Israel Ragadi Tabaco, 17, baro, ken residente iti Barangay III, ditoy met laeng siudad babaen ti bileg ti arrest warrant nga inyisio ni Judge Marita B. Balloguing ti RTC, First Judicial Region, Branch 21, Vigan City gapu iti kasona a panagsalungasing iti RA 6539 wenno Anti-Carnapping Act of 1972.

Naka-docket ti nasao a kaso iti babaen ti Criminal Case No. 7339-V 2014 ket nairekomenda ti piansa a P180,000.00 ken ni Ragadi.

Naipan ni Ragadi iti Vigan City Health Office para iti medical examination sa naipan iti police station para iti umisu a  disposision.#