Lalaki, tinagbat ti bartek

CANDON CITY – Dika makiriri iti nabartek ta desgrasia la ti pagtungpalam. Leksion daytoy iti maysa a lalaki  kalpasan a tinagbat ti nabartek a kalugaranna a kinomprontana gapu ta pinagsawan daytoy ti amana iti dakes.

Nabigbig ti biktima a ni Fred Hernaez, 37, mangngalap ken residente iti Sitio Hillside, Barangay Calongbuyan, Candon City idinto a nainaganan ti masuspetsa a ni Bobby Quines, 29, karpintero ken residente iti nasao met laeng a barangay.

Segun iti imbestigasion dagiti pannakabagi ti linteg, naglaawlaaw ti suspek ket pinobrokar  ken pinagsasawanna iti dakes ti ama ti biktima a napan manggangat iti silaw ti barangay.

 Sinangat ti biktima ken maysa a kabsatna ti suspetsa gapu iti inaramidna iti amada.

Innala ketdi ti suspek ti bunengna ket tinagbatna ti ulo ti biktima sa naglibas.

Naitaray iti Candon City Hospital ti biktima. Insuko met ni Barangay Captain ti suspek iti polis iti kabigatanna. (Danny Antalan)