Lalaki, tinagbat ti kalugaranna

STA. MARIA, Ilocos Sur -Iti panaganawana iti agsubsubang a kainumanna, nakasarak la ket ngarud iti gaddilna.

Gapu iti ibaballaetna iti panagsubang dagiti kakaduana, natagbat ni Julio Montero, 34, residente ti Ag-agrao ditoy nga ili ta isu ti nagdas-alan ti  pungtot ni Cristy Mendoza, 37, kalugaranna.

Segun iti polis, napasamak ti pannagbat bayat ti panagiinom da Montero ken Mendoza ken dadduma a kakaduada iti pagtaengan ti kabsat ti suspetsa.

Mapapati a nakisubang ti suspek iti maysa kadagiti kainomda ket nagganawa ti biktima. Nangala ti suspetsa iti buneng ket tinagbatna ti biktima.

Naitaray ni Montero iti Reyes Clinic and Hospital para iti pannakaagasna. (Danny Antalan)