Lallaki, nasalamaan nga agsusugal, 1 di nakataray

CANDON CITY – Uppat a lallaki ti nasalamaan nga agsusugal sadiay Barangay San Jose ditoy siudad idi malem ti Hulio 16 ngem maysa laeng ti natiliw dagiti polis.

Nagturong dagiti polis iti nadakamat a barangay idi nakaawatda iti tip manipud iti maysa nga umili nga adda agsusugal iti pusoy iti agarup 3:10 sadiay Block 3, Barangay San Jose, Candon City.

Nagtataray dagiti agsusugal idi makitada dagiti polis ngem maysa, ni Rey Nanag y Galleto, 38, naasawaan, ken residente iti Barangay Rubio, Galimuyod, Ilocos Sur, ti nagammatan dagiti pannakabagi ti linteg.

Nakumpiska iti ikut ni Nanag dagiti baraha ken pusta iti nadumaduma a denominasion nga agdagup iti P355.00.

Naipan ni Nanag iti police station para iti  pannakapalutpotna.#