CAOAYAN, Ilocos Sur – Gapu iti bara ti panawen, timpaw dagiti ikan iti sumagmamano nga ili ditoy probinsia.
Naammuan manipud iti Provincial Agriculture Office a timpaw dagiti ikan kadagiti fish cages iti ili ti Caoayan, Cabugao ken Magsingal ket maitudtudo a ti nakaro a kinadagaang ti tiempo ti gapu ti nakatayanda.
Mapattapatta nga agbalor dagiti timpaw nga ikan a pakaibilangan dagiti tilapia ken bangus iti P300,000.00
Kanaig daytoy, indagadag ni Provincial Agriculture Officer Teofilo Quintal ti pannakakali dagiti karayan a nakaipasdekan dagiti fish cages tapno umadalemda ken nawaywaya ti aangsan dagiti ikan, kasta met iti pannakaisardeng iti illegal a panagkalap.
Kabayatanna, inreport ti opisina ti provincial veterinarian a dua a baka ti naireport a natay gapu iti heat stroke sadiay Burgos, Ilocos Sur.#