BANNER: Rinibu a lames, nagtatapaw kadagiti fish cages

CABUGAO, Ilocos Sur- Adu unay dagiti naipasdek a fish cages iti Barangay Dardarat ditoy nga ili ket daytoy ti maitudo a gapu iti panagtapaw dagiti taraken a lames itay nabiit.

Kinuna ni Barangay Captain Charles Garcia a ti panagdidippit dagiti fish cages ti itudtudo ti Bureau of Fisheries and Aquatic Resources (BFAR) a gapu iti panagtapaw dagiti tarakenda a lames iti kallabes.

Kinuna ni Garcia a gapu iti kaadu dagiti naipasdek a fish cages, agkurang iti angsen dagiti lames nga oksiheno a puon ti nagtapawanda. Nasurok a 50 dagiti fish cages ditoy a barangay a pakatartaraknan dagiti bangus ken malaga.

Kinuna met ni Wilfredo Garcia, presidente ti Fishery iti Barangay Dardarat, a sakbay ti panagtapaw dagiti tarakenda a lames, napaliiwda a naugot ket marigatan dagitoy nga umanges.

Lima ti fish cages ni Garcia a pangtartaraknanna iti nasurok 5,000 a bangus ken malaga. Maapit koma dagiti lames inton Disiembre.

Kastoy met laeng ti paliiw ni Barangay Captain Charles Garcia. Kinunana a sakbay a nagpatay dagiti lames, natamnay ti pannanganda kadagiti fish cages.

Dua ti fish cages ti kapitan ket agdagup iti nasurok a 4,000 dagiti tarakenna a pasig a malaga.

Kinuna ni Kapitan Garcia a naituding a malako dagiti tarakenna a lames inton Enero-Pebrero.

Pattapatta ni Kapitan Garcia a 20 porsiento laengen dagiti lames a posible a masalbarda.
Kanaig daytoy, nagkiddaw ni Garcia iti gobierno probinsial iti pinansial a tulong tapno adda pangsulnitda kadagiti nagpatay a tarakenda a lames.

Kinuna met ti dina kayat a painaganan nga agtagikua iti fish cage nga ipatarayda nga ilako dagiti nagpatay a lames tapno isu pay a maabrotda iti pukawda.

Segun kenkuana, awan dakesna ti agsida iti nagpatay a lames agsipud ta nabiitda pay met a natay.

Kinuna met ni Fishery President Garcia nga agmimitingda nga addaan iti fish cages tapno mangiwayatda kadagiti addang tapno saanen a maulit pay ti fish kill.

Maysa a kitkitaenda ti panangipabassitda iti bilang dagiti fish cages tapno nawaywaya ti panagtaray ti danum ken ti dida panangsobra iti bilang dagiti taraknenda a lames tapno saan nga over-populated dagiti fish cages.#