Land Cruiser, dinarusdosna magmagna iti igid ti kalsada

STA. CRUZ, Ilocos Sur – Lima ti natay, pakairamanan ti maysa a masikog idi dinarusdos ti maysa a Land Cruiser dagiti magmagna iti igid ti national highway ti Barangay Mantanas iti daytoy nga ili.

Nainaganan dagiti natay a da Alvaro Abenojar y Sarte, 68; Rosario Abenojar y Calbo, 57; Rica Abenojar y Callao, 31, Revel Gallen y Cabinte, 34, ken ni Mylene Abenojar y Nene, 27, masikog, ken residente iti barangay Mantanas, Santa Cruz, Ilocos Sur.

Nasugatan met da Maring Palos y Ravina, 32, ken ni Vida Abenojar y Gallen, 31, masikog, agpada a residente iti barangay Mantanas, Sta. Cruz, Ilocos Sur; da Arthur Rivera y dela Pena, 34, ken Elly Sagun y Polintan, 61, drayber ken pahinante ti Elf van, agpada a residente iti barangay San Agustin, Candaba, Pampanga; ken da Leo Abaya y Andaquig, 34, ken Honorato Abaya, 42, drayber ken pahinante ti Land Cruiser.

    Iti inisial nga inbestigasion ti polis, mapapati a napukaw ti Land Cruiser ti prenona ket dinarusdosna dagiti biktima a magmagna iti national highway sana dinungpar ti maysa nga Elf.  (Danny Antalan)