Footer

Langgonisa street dancing competition, inarak rinibribu a tattao

VIGAN CITY – Kas ninamnama dagiti opisial daytoy a siudad, rinibribu a tattao ti nagbuya iti Langgonisa Street Dancing Competition itay Enero 22.

Pattapatta ti maysa a lokal nga opisial a nasurok a 30,000 a tattao iti nagdudupudop kadagiti kalsada manipud Plaza Salcedo, iti Quezon Avenue, sa iti Mena Crisologo a yan ti Vigan Heritage Village,  ken iti abagatan ti Katedral ni San Pablo tapno imatanganda ti Langgonisa street dancing competition, tampok a pabuya iti maikapito nga anibersario ti panagbalin ti Vigan a siudad.

Kampeon manen ti San Nicolas, Ilocos Norte idinto nga inyawid ti Caoayan, Ilocos Sur ken ti Camangaan Elementary School ti umuna a gunggona iti nasao a competition a mangitampok iti langgonisa, nalatak a produkto daytoy a siudad.

Tallo a grupo ti nagsasalip iti daytoy tinawen nga street dancing competition: ti Category A a nagsasalipan dagiti agbasbasa iti elementaria; ti Category B, a para kadagiti adda iti sekundaria, ken iti Category C, a dagiti estudiante iti kolehio ken iti local government unit dagiti nagsasalip.

Tallo laeng a pagadalan iti elementaria ti nakisalip iti Category A: ti Vigan Central School, Camanggaan Elementary School, ken San Julian Elementary School. Gapu iti daytoy, napagnunummuanan dagiti judges a maited laeng ti grand prize iti Camangaan Elem. School ket consolation prize kadagiti dua pay a pagadalan a nakisalip.

Nakisalip iti Category B ti Divine High School, Vigan National High West, San Nicolas Ilocos Norte National High School, Vigan National High School ken Ilocos Sur National High School.

Iti Category C, nakisalip ti San Nicolas LGU, MACRO Computer College, Cabugao LGU, University of Northern Philippines, Ilocos Sur Community College,  Caoayan LGU, ken Salinlahi ti Fuerte, Caoayan, Ilocos Sur.

Kas panagkampeonna iti Category B, immawat ti San Nicolas, Ilocos Norte iti P50,000; inyawid met ti Salinlahi ti Fuerte, Caoayan, Ilocos Sur ti P50,000 iti panangiyalatna iti kampeonato iti Category C ken P30,000 iti Camangaan Elementary School iti panangabakna iti umuna a puesto iti Category A.

Dagiti sumaganad dagiti nangabak: Category A – Camangaan Elem. School; Category B – San Nicolas, Ilocos Norte Norte, umuna a gunggona, (P50,000), Vigan National High School East, maikadua (P30,000), ISNHS, maikatlo (P10,000),  Divine High School (P5,000)  ken Vigan National High School West, (P5,000); Category C (Open) – Salinlahi, Fuerte Caoayan, umuna a gunggona (P50,000), Caoayan LGU, maikadua (P30,000), San Nicolas LGU, maikatlo (P10,000) ken consolation prize a P5,000 ti naited iti MACRO, Cabugao LGU, UNP, ken ISCC.

Nagpaay a chairman ti hurado ni Chris Adaya, director dagiti nalatak a telenobela iti GMA 7 a pakaibilangan ti  “Bakekang” ken “Sa mga Mata ni Angelita, idinto a kamkameng da Arthur Alambat, maysa a nutritionist a naggapu sadiay San Francisco, California, ken ni Armando Sta.Ana a naikkan pammadayaw manipud iti Cultural Center of the Philippines. 

Dagiti criteria ti pasalip: 50% iti performance manipud iti street dancing a naaramid iti malem ken 50% iti showdown competition iti karabianna a pannakakorona ti Miss Vigan City.#