Lantip puso 2012, naangay iti Caoayan

CAOAYAN, Ilocos Su r – Agdagup iti uppat a pulo ket innem nga asmang ti naglantip ti pusoda iti naangay a mass wedding nga inesponsoran ti mayora ditoy nga ili idi Mayo 8.

Naangay ti “Lantip-Puso 2012” dagiti nasao nga asmang iti simbaan katoliko ditoy nga ili idinto a naangay ti merienda cena iti rangtay a nangbeltak iti Mestizo River.

Napaserraan ti rangtay iti manipud iti ala una agingga iti alas nuebe para iti daytoy espesial nga okasion.

Inesponsoran ni Mayor Germe Singson-Goulart daytoy a panaglantip iti puso iti ikub ti  nasantuan a matrimonia dagiti asmang a residente amin ditoy nga ili a kaadduanna ti nabayagen nga agdendenna ken addaan payen kadagiti annak.

Iti naangay a paruad, binitinan dagiti ninang ken dagiti  agtuturay ti Caoayan dagiti nagkasar iti kuarta. Naipatayab pay dagiti balloon.

Adda pay pasalip iti most passionate kiss ket nagunggonaan  ti nangabak  nga asmang iti kuarta iti maysa a rabii iti NSCC hotel.

Kinuna ni Goulart nga ikarkarigatanna latta a tungpalen iti tinawen daytoy a karina iti “ngato”.

Awan ti nagasto dagiti asmang ti panagkasarda.#