Laoag City, kampeon iti Tobacco Festival Streetdancing Competition

CANDON CITY – Kas ninamnama, imbalat ti Laoag Pamulinawen dance group dagiti walo a nakabalubalna para iti championship ket inyawidna ti P75,000 a premio.

Maikadua ti Teodoro Hernaez National High School ti Santa Lucia ket inyawidna ti P50,000 a premio ken maikatlo ti Dili National High School ti Santa Cruz, Ilocos Sur ket inyalatna ti P30,000 a premio.

Rinibu a tattao ti nagbuya iti streetdancing ken showdown competition a naangay iti Candon City Quadrangle iti likudan ti Candon South Central School idi Marso 28.

Kabayatanna, ti higante a nadubla a tabako ti maysa kadagiti kangrunaan a nakaawis iti panagdayaw dagiti rinibribu a tattao a nakipagrambak iti Tobacco Festival a naangay ditoy siudad itay nabiit kas paset ti maika-113 nga anibersario ti ā€œIkkis Ti Candonā€ ken maika-10 a tawen ti panagsiudad ti Candon.

Immuna a naiparang ti higante a nadubla a tabako bayat ti panakaisayangkat ti tobacco rolling contest (panagdubla) ken Tobacco Day iti Candon City Plaza idi Marso 24 sa karaman a naiparada idi Marso 28 a pannakaisayangkat metten ti streetdancing competition.

Indauluan ni National Tobacco AdministrationĀ  chief Edgardo Zaragoza ti pannakarambak ti Tobacco Day a pannakapili ti Miss Virginia Tobacco, kadakkelan a salipĀ  ti beauty and brains a nakipartisiparan dagiti nadumaduma nga ahensia ken inatendaran dagiti opisial dagiti sanga ti NTA manipud iti probinsia ti Ilocos Norte, Abra, La Union ken Ilocos Sur.

Kas pannakipagmaymaysana iti parambak daytoy siudad a nakaitanduduan ti kadakkelan a cash crop ditoy probinsia, inaramid ti United Leaf Philippines Inc. ti nasao a higante a dinubla a tabako nga agatiddog iti agarup 120 a metros a nakaaramatan iti 170 kilos a bulong ti tabako, ken addaan iti diametro nga agarup 4 a pulgada.

Ti Candon City ti kadakkelan a producer ti tabako iti sangkapagilian ket tinawen a ramrambakanna ti Tobacco Festival kas panangitandudona kadagiti mannalon nga agmulmula iti daytoy a cash crop.

Ditoy probinsia ti pagtaudan ti 70 porsiento ti pakabuklan a produksion ti tabako iti deppaarna ti amianan. (Danny Antalan)