Lawin

Imbiit ni Jobert M. Pacnis

ADDA text ni sir,’ kinuna ni Ma’am Lianne kadayta nga agsapa ti Martes a ti prinsipalmi ti kayatna a sawen. Apagisu a sumrekak iti opisinami.

Saan kad’ pay a sumrek ita?” sinaludsod ni Ma’am Elizabeth.

Nagpasiudad ni sir idi pay kalman ta adda ipagpagnana a pappapel idiay Division Office wenno nalatlatak iti awagna a D.O.

“”Di pa, ma’am. Hindi raw natapos kahapon ang mga sinadya niya sa D.O.”

“’Ania dayta in-text ni sir, ‘ding?” inamad met ni Ma’am Rose Ann a manarimaan nga agisagsagana kadagiti ramitna para iti umuna a period-na. Titser pay la idi ni Ma’am Lianne isu a “’ding” ti nairuam nga awagna kadaytoy.

Imbuksilan ni Ma’am Lianne ti text.

“’Al-it!” addayta manen ti pannakaarkos ti ngiwat ni Sir Arvie. “Nagladaw metten nga announcement dayta! Addatayon ditoy pagadalan! Sayang ti gasolinak… ‘al-it!”

Kaidedeklara kano ni gob, sir,” kinuna ni Ma’am Lianne.

Wen, a, ngem agin-init met pay laeng…” kinunak.

Napardas kano ngamin ti yaasideg ni Lawin, sir. Sa maysa, tapno makapagsagana dagiti ubbing iti panagbakuitda aglalo ket super typhoon ti category-na.”

Intalmegko ti buzzer ti pagadalan tapno mapanen aglinia dagiti ubbing para iti flag ceremony. Maysanmaysa ti nagturong iti playground.

Ngem, ne, sakbay nga ibagatayo ti announcement,” ni manen Ma’am Lianne, “daydiay bilin ni sir, diyo liplipatan, Sir Arvie…”

OK, ma’am. ‘Al-it, mapasabak man dataon!”

Nagdardarasak metten a nagpa-new site a nagliliniaan dagiti ubbingmi. Adda daytoy iti agarup 100 metro iti lauden ti old site. Isaganak pay idiay SSG room ‘tay sound system a mausar.

Saankon a pinatokar ti zumba nga exercise dagiti ubbing apaman a nalpas ti flag ceremony. Intedko a dagus ti mikropono ken ni Ma’am Rose Ann a pannaka-senior-mi no posision ti pagsasaritaan.

Kinablaawanna dagiti ubbingmi. Rinugianna nga impalawag nga adda mapasamak a Disaster Drill kas iti ginggined kas pang-follow up kadagiti naisuro kadakuadan ta kas sangkakunada, practice makes perfect. Ngem kunami: constant practice can save life. Kalpasanna, asikasuenda ti test permit-da para iti 2nd Periodic Test a nayeskediul inton bigat ken iti kabigatanna (nga alanganinen a matuloy).

Awan arimekmek dagiti ubbingmi. Yes, ma’am! Kasta lattan ti sangkaisungbatda idinto a sangkataliawda dagiti kayo iti aglawlaw a sipsiplagan sagpaminsan ti napigsa nga angin nupay sumirsirip pay laeng ti init. Dumaranudor payen ti baybay agarup 85 metro laeng iti amiananenmi.

Kalpasan dagitoy,” ni Ma’am Rose Ann, “mabalinyonton ti agawid ta itay laeng naideklaran ti probinsiatayo a signal number 2.”

“”Yeeesssss!” uray la nagsisipat ti kaaduan kadagiti ubbing aglalo la ngaruden dagiti lallaki.

Nga inatipa a dagus dagiti kakaduak a naiwaras iti babaet dagiti ubbing.

Ngem diak nateppelan ti riknak. “Ano ang nakatutuwa doon?” naisalingbatko. “Super typhoon ang darating sa atin, ikinatutuwa niyo pa? Saanyo nga ammo ti mabalin nga ipaayna? Category 5 ti mabalin a pigsaen ni Lawin. Kayang patumbahin ang mga concrete na bahay o mga gusali. At alalahanin ninyo, karamihan sa atin ay nasa tabing-ilog at tabing-dagat. Di malayong lalaki ang mga alon at papasok sa mga kabahayan natin!”

Ngem ti siudotko ta nakitak pay laeng a nagiinnapir dagiti tallo a lallaki iti Grade 10.

Walang pasok, yes!” sada pay la inranta nga impangngeg.

At talagang masaya pa kayo?” kinunak. “Apay, nakasaganakayo kadin iti didigra a yeg ni Lawin? Super typhoon… alalahanin ninyo!”

Ngem nagdudusngiitda ketdi. “Kaya ‘yan, sir!” sa pay la kinuna ni Donel.

Sabsabali a talaga dagitoy ubbing ditoy nakaipalladawak. Ngem sakbay a maiburuang a naminpinsan ti riknak, binay-ak lattan ni Ma’am Rose Ann a mangituloy iti sawenna pay.

Pinastrekmi pay laeng dagiti ubbingmi kadagiti kuartoda. Kalpasan ngata ti lima minuto, nagturongen ni Sir Arvie iti old site tapno pagunienna ti buzzer ta ag-drill sadiayen dagiti Grade 7 ken maysa a section ti Grade 8. Siak kano metten ti makaammo ditoy new site a ‘yan dagiti Grade 9 agingga iti Grade 11 ken maysa pay a seksion ti Grade 8 yantangay adda met latta buzzer a nakapuesto iti SSG room a sumango iti playground.

Nabayag a pinagunik ti buzzer. Agsasaruno a rimmuar dagiti ubbingmi kadagiti kuartoda apaman nga insardengko ti nag-buzzer. Nakakallugong dagiti imada iti uloda ken naurnos ti liniada a nagturong iti playground. Inasitgan dagiti adbayserda apaman a nakatugawda. Narugian ti panagbilang.

Kalpasan ti drill, naikkan dagiti ubbing iti tallopulo agingga iti maysa nga oras nga agpapirma sakbay a mapalubosanda nga agawid.

Nagturongak metten iti office-mi iti old site idi maisimpak ti sound system. Nasarunok ti grupo ti sumagmamano nga ubbing a mapan la ketdi agpapirma kadagiti concerned teacher.

Intay pay la agpalpallailang idiay sentro sakbay nga agawidtayo,” adda nagkuna.

“’Sino daydiay?” sinaludsodko.

Da Manong BJ, sir,” kinuna dagiti adda iti sangok; a ni Brent John ti kayatda a sawen.

Ti man gayamen grupo da Donel!

Kinamakamko ida ket nakigiddanak a nagna. “Saankayon a mapan idiay ili, balong. Agawidkayto a dagusen,” kinunak kadakuada. Ibanagda ngem maawatanda ti Ilokano.

Yes, sir,” kinuna ni Dexmark ngem nakalibbi. Nasiputak pay unay ti panangsikilna ken ni BJ.

Kitaenyo ti maitulongyo…”

Nagkikinnitada laeng.

Inunaak ida.

Ngem nagdayamudomda iti bukodda a pagsasao—a diak naawatan ta nabiitak pay met a naidestino ditoy ilida.

Ngem kinamakamnak ti maysa kadagiti ubbingko iti Grade 7.

Sir, pupunta pa rin daw sila sa plasa,” kinunana. “Adu la unay kano dayta a bagbagyo… kuna ni Manong Donel!”

Dagitoy nga ubbing a talaga!

Sublianak koma ida ngem saanak met ngatan a nagkurang iti pammagbaga kadakuada. Sa maysa, adu pay ti agur-uray kaniak nga agpapirma idiay office kas adviser ti SSG.

PERMI ti namsaakan ni Lawin. Adu ti dinadaelna a pagtaengan, ti tinuangna a poste ti kuriente, ti tinukkolna a kaykayo ken inyanudna a dinguen. Sembreak iti sumuno a lawas nga isu met ti INSET-mi wenno In-Service Training for Teachers.

Ket iti Nobiembre 2 a serrekmi, naklaatkami laengen idi nadamagmi a natay ti tatang ni Donita nga adalanmi. Nayanud kano ti bangkana (ta maysa a bangkero) a nangsubli iti dadduma a gargaretda kabayatan ti panagbakuitda.

Di kad’ kabsat ni Donel ni Donita?” inamad ni Ma’am Lianne.

Ket wen!” insungbat ni Ma’am Jonalyn.

Ket nalagipko ti grupo ni Donel.#