Leccio, kadaanan a pannakakanta iti panagladingit ni Birhen Maria iti pannakatay ti anakna a ni Kristo

Manipud iti sinurat ni Imelda C. Rivero

VIGAN CITY – Ammomon a Semana Santa no mangrugin a maipatangatang kadagiti lokal a radio stations ti leccio wenno kanta ti panagladingit dagiti Ilokano.

Nangrugi itay Abril 1, Nasantuan a Mierkoles, naipatangatang kadagiti estasion ti radio ti leccio wenno kankanta ti panagladingit ni Maria, ti ina ni Kristo, ti panagsangitna gapu iti brutal a pannakatay ti anakna, ni Hesuskristo, babaen dagiti Hudio.

Kinuna ni Nana Amparo Alcain, 63, retirado a maestra, idi 1960s, mapan agkanta iti leccio kadagiti estasion ti radio dagiti nataengan a lumeleksio iti Vigan ken kaapiringna nga ili kas iti Caoayan, Bantay, San Vicente ken Sta. Catalina. Segun kenkuana, adun nga agkankanta iti leccio ti natayen ngem maipatpatangatang pay laeng dagiti nairekord a kantada agingga iti agdama.

Nakuna pay ni Nana Amparo nga idi adda pay laeng iti grade school, mabilinda nga agdengngeg iti leccio.

“Estrikto dagiti nagannak kadakami, paggianendakami iti kuarto wenno salas ket siulimekkami nga agdengngeg iti saan nga agpulsot a pannakaipatangatang iti leccio,” innayon ni Nana Amparo.

Kinunana a sana la naawatan ti kaipapanan ti naladingit a pannakakanta ti leccio babaen ti panagkararagda iti 14 nga estasion ti Krus.

Agingga iti agdama, maipatpatangatang pay laeng ti leccio kadagiti tallo a radio stations iti probinsia kas iti DWRS, DZNS, ken DZTP.Nagbalinen ti pannakakanta iti leccio a tinawen a tradision.

Ngem ita a tawen, adda naikabil a puesto a pagkantaan iti leccio iti asideg ti Vigan Metropolitan Cathedral no sadino a mapadasan dagiti residente ken bisita ti kadaanan a wagas a pannakakanta iti passion ni Kristo.

Kinuna ni Nana Amparo a mangnamnama a mapreserba ti ti tradisional a kanta dagiti natay kas iti leccio kas paset ti tawid dagiti Ilokano.#