Legal researcher ti korte, ginudas ti nakamotorsiklo a lallaki

BANTAY, Ilocos Sur – Maysa a legal researcher ti regional trial court iti Vigan City ti ginudas ti dua a lalaki a nagsakay iti motorsiklo iti malem ti Disiembre 23 iti Barangay Zone 4 ditoy nga ili.

Segun iti report, agdaldaliasat iti nadakamat a barangay ti traysikel anagluganan ni Villamor Ilmeng, legal researcher iti Regional Trial Court Branch 21 iti Vigan City, idi pinaltogan dagiti di pay nabigbig a suspetsa a nakasakay iti motorsiklo a mapapati a nangsaruno kenkuana.

Awanen ti biag ni Ilmeng idi maidanon iti Metro Vigan Cooperative Hospital ditoy met laeng nga ili.

Iti inisial nga inbestigasion dagiti polis ditoy, nagsagrap ti biktima kadagiti sugat iti nadumaduma a paset ti bagina.

Nakarekobre dagiti otoridad iti lima a kapsula manipud iti di pay masinunuo a paltog iti nakapasamakan ti krimen.

Malaksid iti trabahona iti korte, masansan a mangeg ti ballakad ni Ilmeng mainaig iti linteg iti programa a Duralex Zedlex iti Bombo Radyo Vigan.

Iti pannakaisurat daytoy, kinuna ti polis nga adda kitkitaenda nga anggulo mainaig iti pammapatay ngem dida inlatak tapno saan a maunaan ti panagimbestigada.#