LGU-Cabugao, P.T. Diamond Construction Company, nagpinnirma iti BOT agreement

CABUGAO, Ilocos Sur – Nagpinnirma itay Agosto 27 iti Build-Operate Transfer agreement ti lokal a gobierno ditoy nga ili ken ti P. T. Diamond Construction Company para iti pannakaipatakder ti maysa a commercial center ditoy.

Imbagian ni Mayor Edgardo S. Cobangbang, Jr., ti gobierno ti Cabugao idinto nga imbagian ni Pablo H. Tan ti PTDCC iti panagpinnirma iti BOT agreement nga inimatangan dagiti konsehal a pakaibilangan da SBM Danny Q. Gazmen; SBM Josefina S. Vallejo; ken SBM Vicky S. Serna; ABC President Thaddeus U. Soller ken ni SB Secretary Maxfel S. Suboc.

Maipalagip a naaramid ti groundbreaking ceremony mainaig ti pannakaipatakder ti commercial center idi Abril 16, 2015.

Paset ti seremonia ti panangipisok da Cobangbang ken Tan iti time capsule iti abut nga agpaay a baton-lagip iti pannakabangon iti nasao a commercial center.#