Footer

Libre a panagadal iti panagkompiuter, nangrugi a maisayangkat

CABUGAO, Ilocos Sur – Adda maisaysayangkat a libre a panagadal iti panagaramat iti internet iti municipal hall ditoy nga ili nangrugi idi Septiembre 14.

Maang-angay ti klase kadagiti residente ditoy, nangruna dagiti estudiante ken empleado nga interesado iti panagusar iti internet manipud iti alas una agingga iti alas 5 ti malem, daytoy ti nakalap ti Tawid News Magasin.

Itay nabiit, naipasdek ti Cabugao Community eCenter  ditoy nga ili babaen ti panagkinnamayet ti gobierno munisipal nga idadauluan ni Mayor Edgardo “Ediboy” S. Cobangbang, Jr. ken ti Philippine Community eCenter, maysa nga institusion iti babaen ti Department of Science and Technology ken ti National Computer Commission nga agipasdek kadagiti pasilidad ti komunikasion kadagiti lokal a gobierno tapno makasursuro dagiti umili nangruna dagiti agnaed iti barangay nga agusar iti baro a teknolohia ti impormasion para iti panagdur-as ti biagda ken iti komunidad.

Kangrunaan a panggep daytoy a programa ti panagpaay ti  eCenter a pagadalan dagiti interesado a makasursuro iti kabaruanan a wagas ti impormasion ken komunikasion nangruna ti computer babaen dagiti seminar-workshop iti babaen ti MPDC.

Kinuna ni Mayor Cobangbang a karaman a makipagusar iti daytoy a pasilidad dagiti estudiante ti Alternative Learning System (ALS) tapno masursuruan dagiti agtutubo iti kabaruanan a teknolohia ti impormasion.

Sakbay ti launching, sumagmamano a kameng ti MPDC ti nagsanay maipapan iti nasao a programa para iti pannakaidur-asna iti munisipio ken kadagiti agindeg ditoy nga ili nga interesado nga agsursuro iti baro nga information technology.

Lima a computer units nga addaan iti internet connection ti naikabil iti maikadua a kadsaaran ti municipal hall nga aramaten dagiti agindeg ditoy. Counterpart ti gobierno munisipal ti lugar a pakaikabilan dagiti computers ken pannakaikabit ti internet connection.

Kanaig daytoy, pinatalgedanen ti konseho munisipal ditoy ti akreditasion ti Cabugao Community eCenter idinto nga intudingna dagiti pagannurotan iti pannakaaramatna ken ti pagrebbengan dagiti mangusar kadagiti computers.

Katinnulong ti munisipio dagiti opisial ti Cabugao SK Federated Association a mangmentener iti daytoy a programa.

Kas paset ti programa ti gobierno munisipal a mapabaro dagiti rekord dagiti nadumaduma nga ahensia ditoy nga ili, tunggal opisina ket addan computerna a konektado iti internet.#