Libre nga abono, naiwaras kadagiti mannalon

STA. LUCIA, Ilocos Sur – Nagiwaras ti lokal a gobierno ditoy iti libre a ganagan para kadagiti mannalon tapno dumakkel ti produksionda iti pagay iti daytoy a panagtatalon.

Kinuna ni Mayor Estrella Hernaez a naisaruno a naiwaras ti libre nga abono nga ammonia kalpasan a naibunong kadagiti mannalon ti hybrid rice wenno Ryan rice manipud iti gobierno probinsial.

Agdagup iti 1,300 a sako ti ammonia ti naiwaras kadagiti agarup 3,559 a mannalon ditoy. Tallo a mannalon ti agbibingay iti maysa a sako ti ganagan.

Itay nabiit, nawarasan ti Sta. Lucia iti 940 bags a hybrid rice a maimula iti 470 ektaria. (Danilo Antalan)