Footer

Libre nga abono, naiwaras

SAN ESTEBAN, Ilocos Sur – Nasurok a 900 a mannalon ditoy ti nawarasan iti libre nga abono itay nabiit.

Kinuna ni Mayor Chester Elaydo a nagkinnamayyetan ti gobierno munisipal ditoy ken ni Diputado Eric Singson daytoy a gannuat a pannakaited iti libre nga abono kadagiti mannalon ditoy nga ili.

“Babaen ti pondo a naggapu ken ni Cong. Singson ken ti pondo ti municipal government, gimmatangkami ti abono tapno maiwaras kadagiti mannalonmi ditoy San Esteban,” kinuna ni Elaydo.

Kinuna ti mayor nga inggannuatda daytoy tapno matulongan dagiti mannalon nga agprobproblema iti kangina ti magatang nga abono.

Kinuna ni Elaydo a nangipasa ti sangguniang bayan ditoy iti ordinansa a  mangilatang iti 20% manipud iti RA 7171 a direkta a maitulong kadagiti mannalon.

Innayon ti mayor a manipud iti daytoy a pondo,  prioridad ti panangited iti libre nga abono kadagiti mannalon tapno ngumato ti produksionda  iti talon.

Naammuan ken ni Elaydo a maikaduan a tawen nga isaysayangkatda daytoy a gannuat.

Kangrunaan a problema dagiti mannalon iti agdama ti kinangina ti abono ken dadduma pay a kasapulanda iti talon.

Tapno maalay-ayan daytoy a parikut dagiti mannalon, nangipaay ti national government babaen ti Department of Agriculture iti fertilizer subsidy kadagiti mannalon.#