Footer

Lider ti Luciana Drug Group, natnag iti buy bust operation

STA. LUCIA, Ilocos Sur – Nanabtuog ti maysa a lider ti grupo nga aglaklako iti droga babaen iti buy bust operation nga inwayat dagiti nagtitipon nga elemento ti kapolisan sadiay Barangay Burgos, ditoy nga ili idi malem ti Septiembre 29.

Inaresto dagiti police elements a pakaibilangan ti Sta. Lucia MPS, PDEA RO1, ISPPSC, ken PAIDSOTG ni Edward Romulo Festejo y Ridad, 44, residente iti nadakamat a barangay, ken maysa a Christopher Mangornong y Fernandez, 38, residente iti Barangay Lucboban, Salcedo, Ilocos Sur.

Segun iti polis, ni Festejo ti lider ti Luciana Drug Group ken numero uno iti municipal drug target list.

Nakakumpiska dagiti polis kadagiti suspek iti pito a heat sealed transparent plastic sachet a naglaon iti mapapati a shabu nga agdagsen iti sumurok-kumurang 50 grams; 3 stainless scissors; 2 di naaramat a plastic sachet; maysa a Samsung cellphone; maysa a Nokia cellphone; 9 a bala ti shotgun; maysa a leather black wallet; kuarta iti nadumaduma a denominasion a pakaibilangan ti innem a sag-P200.00; 9 a sag-P100.00; 6 a sag-P50.00 ken 3 a sag-P20.00 nga agdagup iti P2,460; ken dua a sag-P 500.00 a naaramat a buy bust money.

Kalpasan ti medical examination iti Sta. Lucia District Hospital, naipan dagiti suspek iti police station para iti umisu a dokumentasion.

Kabayatanna, inaresto ti polis-Burgos ken PDEA, RO1 ti maysa a mannalon kalpasan a nakakumpiskada iti ikutna iti droga babaen iti inwayatda a buy bust operation iti Barangay Mambug, Burgos, Ilocos Sur idi sardam ti Septiembre 30.

Nakakumpiska dagiti polis iti ikut ni Jay-R Fieldad y Domingo, 28, baro, mannalon, ken residente iti nadakamat a barangay, iti maysa a pedaso ti heat sealed plastic sachet a naglaon iti mapapati a shabu.

Kinumpiska pay dagiti polis ti P500.00 a naaramat a buy bust money.

Naipan ti suspek iti police station para iti umisu a disposision.#