Lider ti organized crime group, naaresto sadiay Bacnotan

SAN FERNANDO CITY – Maysa a mapapati a lider ti maysa nga organisado a kriminal a grupo a sumangsango iti sumagmamano a kaso iti korte ti nanabtuog iti ima dagiti polis iti checkpoint sadiay Barangay Say-oan, Bacnotan, La Union idi sardam ti Abril 22.

Kinuna ni Police Chief Supt. Ricardo C. Marquez, regional director iti Police Regional Office 1, a kinemmeg dagiti operatiba ti Regional Special Operation Group ti Regional Intelligence Division (RSOG-RID), La Union Provincial Intelligence Branch (LUPIB), La Union Provincial Public Safety Company (LUPPSC) ken Bacnotan Police Station ni Loreto Y. Aquino, 33, naasawaan, ken residente iti Barangay Arosip iti nadakamat nga ili, kalpasan a pinasardeng dagiti polis ti Toyota Corolla a minaneho daytoy iti checkpoint a naipasdek sadiay Barangay Say-oan, Bacnotan, La Union idi sardam ti Abril 22.

Kinuna ni Marquez a naaresto ni Aquino babaen ti bileg dagiti tallo a warrants of arrest nga inyisio ti tallo a hues gapu iti sangsanguen ti akusado a kaso a naiyuli iti korte ti Bacnotan, San Fernando City ken La Trinidad, Benguet.

Sumangsango ni Aquino iti kaso a panaglabsing iti RA 8294 wenno illegal a panagikut iti paltogĀ  iti sala ni Judge Jeovanie C. Ordono ti Municipal Trial Court (MTC), Bacnotan, La Union; kaso a panaglabsing iti RA 6539 wenno anti-carnappingĀ  iti sala ni Judge Asuncion Fikingas-Mandia ti Regional Trial Court Branch 29 iti San Fernando City; ken kaso nga slight physical injuries a naisalpa maikontra kenkuana iti sala ni Judge Agapito K. Laoagan ti MTC, La Trinidad, Benguet.

Sabali pay a kaso ti naipila maikontra ken ni Aquino,Ā  ti panaglabsing iti RA 8294 ken Comelec gun ban maigapu ta nakakumpiska dagiti polis iti maysa a US caliber .30 carbine rifle ken maysa a magasin a nagkarga iti 11 a bala iti uneg ti kotse ni Aquino.

Naipatulod metten ti nakumpiska a paltog iti Regional Crime Laboratory Office 1 para iti ballistic examination.

Kinuna ni Marquez a maibasar iti report ti panagimbestiga dagiti operatiba, ni Aquino ti mapapati nga acting a dadaulo ti Espada Group, organisado a grupo ti kriminal nga agop-operate iti Region 1 ken sumagmamano a paset ti Luzon.#