Liklikan ti kinadamsak iti politika, apila ti mayor iti Santa Catalina

Mayor Edgar Rapanut with members of ISIP (photo by Edward Antonio)

SANTA CATALINA, Ilocos Sur – Pagtalinaeden koma ti kappia ita a masungad a kampania ken eleksion tapno maliklikan ti kinadamsak iti politika iti ili ti Santa Catalina, Ilocos Sur.

Dayta ti apila ni Mayor Edgar Rapanut kadagiti kailianna kabayatan ti pannakiuman kenkuana dagiti kameng ti Ilocos Sur Integrated Press iti naangay a Kapihan iti Amianan Media Forum.

Inaklon ti mayor nga idi damona ti agkandidato idi napalabas a 2016 ket nagbalin a nainget ken nabara ti eleksion iti ilida gapu ti saan a pannakatengngel dagiti pasurot ken supporter dagiti politiko ta adda pay maysa a napaltogan. Impakaammona uray no saan a nagnanaed iti nabayag a tiempo iti ilida ken uray agdadamo idi iti politika ket isu ti tinalek dagiti kailianda.

Inaklonna nga idi 2016 idi agalimpatoken ti kampania ken sakbay ken kalpasan ti eleksion ket naidestino dagiti adu a kameng ti Philippine National Police ken Philippine Army babaen ti kiddaw ti Parish Pastoral Council for Responsible Voting ti Social Action Commission ti Arkidiosesis ti Nueva Segovia tapno malapdan dagiti tumaud a riribuk.

Nakabalubal idi ni Mayor Rapanut ni Mrs. Flora Asuncion, asawa ti agdama idi a nag-last term a mayor ni Engr. Carlos Asuncion. Agsalisal ita nga eleksion ni Mayor Rapanut ken sigud a Mayor Asuncion. Kadua ni Mayor Rapanut iti Bileg Party a para bise mayor ni sigud a Sangguniang Bayan Member Jojo Redoble. Katiket met ni Engr. Asuncion iti Nationalist People’s Coalition ni Incumbent Vice Mayor Antonio Rabang.

Kiniddaw ni Mayor Rapanut kadagiti padana a kandidato ken dagiti pasurot ken supporterda nga ikagumaanda a pagtalinaedan a nakappia ti eleksion iti Santa Catalina ta maymaysa met laeng ti panggepda nga agserbi iti ilida ken kadagiti kailianda. Impaganetgetna a saan a rumbeng nga adda agtedted a dara wenno maisakripisio a biag gapu laeng iti politika. Nagapila kadagiti kailianda nga integridad, kabaelan ken gapuanan koma ti kangrunaan a pagbasaranda iti panangpilida kadagiti itandudoda, ken pagbalinenda a “friendly game” ti eleksion.

Kiniddawna met iti Commission on Elections ti pannakalapped koman ti panagbotos dagiti flying voters nga aggapu iti kabangibangda a lugar ta saanda met a talaga nga agnanaed iti Santa Catalina ngem ditada a nakarehistro ken bomotbotos.

Inlawlawag ni Mayor Rapanut a nasayaat ti relasionna kadagiti makabalubalda a kandidato nga agdama nga opisial iti Santa Catalina, ken dandani pay nagkaykaysada iti partido a pagtarayan ngem saan laeng a naurnos ta pinatganna ti kalikagum nga agkandidato manen a para bise mayor ni Redoble a katiketna idi 2016. Inlawlawagna a saan koman nga agkandidato a para mayor ni Engr. Asuncion no nakapagkadua da Mayor Rapanut ken Vice Mayor Rabang, ken sag-uppat nga incumbent councilors ken baro a papili ti aggapu kadagiti agsumbangir a grupo.

Iti met pannakiuman dagiti kameng ti ISIP kadagiti sumagmamano nga umili iti Santa Catalina, nagkaykaysada iti karirikna ken kapanunotan a nasaysayaat nga adda nainget a salisal dagiti kandidato iti ilida tapno adda pagpilian dagiti botante, ken pabor kadakuada ta ad-adu dagiti maipaay a benepisio kadagiti umili no adda dagiti napigsa nga agbabalubal. Nagkaykaysada met iti kiddaw a maliklikan koma ti kinadamsak iti politika iti ilida ken iti intero nga Ilocos Sur.