Lineman, nakoriente, natay

SAN ILDEFONSO, Ilocos Sur – Nakoriente ti maysa a lineman ti Philippine Long Distance Telephone bayat ti panagikabitna ti kable ti PLDT sadiay Poblacion West, ditoy nga ili idi bigat ti Septiembre 26.

Nupay pinakatan iti first aid treatment dagiti nagresponde a personnel ti Municipal Health Office ni RJ Alejan, 27, natibo iti Baliuag, Bulacan ngem agdama nga agnaed iti Paing, Bantay, Ilocos Sur, saanen a naidanon daytoy a sibibiag iti Northside Doctor’s Hospital.

Segun iti report, immuli ni Aljan iti poste ti Ilocos Sur Electric Cooperative Inc. tapno agikabit iti kable ti PLDT ket mapapati a pinutedna ti maysa a ground wire a puon ti nakakorienteanna agingga iti naawanan puot ken nagbitin iti poste ti koriente.#