Komentario: Listaan dagiti rinuker a politiko | Tawid News Magazine - Weekly Ilocos News 📰

Listaan dagiti rinuker a politiko

ADDANTO ngata dakkel nga epekto iti kandidatura dagiti politiko a nairaman iti narcolist a kaudian nga inrakurak ni Presidente Rodrigo Duterte, wenno maituladto laeng daytoy kadagiti nalatak a kurakot a politiko nga uray ammo ti publiko ti dakes nga aramidda ket agtultuloy met ti panangabakda iti eleksion?

Urayen dagiti umili a malpas ti eleksion inton Mayo 13, 2019 no addanto dakkel nga epekto iti botos dagiti kandidato a maatap a narcopoliticians wenno dagiti adda pannakainaigna iti illegal a droga.

Inrakurak ni Presidente Duterte ti narcolist dagiti 46 a politiko buklen dagiti tallo a kongresista ken 43 a lokal nga opisial – 35 a mayor, pito a bise mayor, ken maysa a kameng ti Sangguniang Panlalawigan wenno board member.

Mairaman kadagiti tallo a naakusaran a kongresista ket taga-Pangasinan, ken adda pay mayor iti Ilocos Norte ken Cagayan. Mairaman pay dagiti dadduma a politiko a nainagananen iti umuna a listaan nga inrakurak ni Presidente Duterte iti naglabas.

Paglikudan dagiti nainagaganan a politiko ti pammabasol kadakuada. Adda dagiti nangibaga a nabayagen nga isyu ti pannakainaigda iti illegal a droga ken nadalusandan dagiti naganda iti naglabas, ken masdaawda ta napagbiag manen ita a masakbayan ti eleksion. Adda met dagiti mamati a politically motivated ti pannakairamanda iti narcolist a nairanta a panagdadael kadagiti reputasionda tapno maabakda.

Inrakurak ni Presidente Duterte ti nagan dagiti maatap a narcopoliticians iti laksid iti nainget a kritisismo ti Commission on Human Rights a mailabsing dayta iti karbengan dagiti mainaganan a politiko. Impalgak met ti Commission on Elections a saan nga umanay ti pannakairaman dagiti kandidato iti narcolist tapno ma-disqualified-da iti kandidatura ta kasapulan ti final judgement ti Korte Suprema.

Impasagepsep ni Duterte a dagiti innagananna a politiko iti narcolist, kas opisial ti gobierno, ket awananda ti naan-anay a karbengan iti pannakailimed ti pribado a panagbiagda para iti transparent government. Imbutaktakna ti baro a narcolist tapno mapakaammuan dagiti botante kadagiti rumbeng a butosanda a kandidato.

Dakes ti epekto ti narcolist kadagiti inosente a politiko a nairaman ta saan laeng nga isuda ti maseknan ngem uray dagiti pamiliada nga aglak-am ti pannakaibabain ken pananghusgar kadakuada ti publiko.

No biddut iti pannakairaman ti inosente a politiko, nadadaelton ti reputasionna ken ti pamiliana, uray no agpadispensarto manen ni Presidente Duterte kas ti inaramidna iti naglabas idi inakusaranna ti maysa nga opisial ti Pangasinan nga adda pannakainaigna iti illegal a droga.

No talaga a napudno ti panggep ni Presidente Duterte iti panangibulgar ti narcolist, rebbengna nga inramanna koma iti listaan dagiti nalatak a politiko a nainanaig iti illegal a droga. Addan dagiti politiko ken kandidato a nalatak ken nabalud pay gapu iti illegal a droga ngem saan a nairaman iti narcolist ti Presidente.

No talaga a ti panggep ni Presidente Duterte iti pannakaibulgar dagiti maatap a narcopoliticians ket tapno saanda a maisaad iti akem gapu ta rinukerda a politiko, rebbengna a saan laeng a dagiti kandidato nga adda pannakainaigna iti illegal a droga, ngem uray pay dagiti amin a politiko nga addaan iti nadagsen a kaso kas dagiti sumangsano iti graft and corruption ken plunder, tapno mapakaammuan dagiti botante ken maikampaniada a saan idan nga ibotos dagiti umili.

Ti panagraira ti illegal a droga ket epekto ti narigat nga ekonomia iti Pilipinas a gapu ti agtultuloy a kurapsion iti gobierno. Adda dagiti napanglaw ti agusar iti illegal a droga kas wagas ti panangliwliwada kadagiti bagbagida tapno uray iti apagapaman laeng ket malipatanda dagiti rigat iti panagbiag a sagsagrapenda.

Kas ti illegal a droga, nakaro ti dakes nga epekto ti kurapsion nga agtultuloy a nagraira iti gobierno. No matakaw dagiti adu a pondo, saan a maipaay ti umno a serbisio kadagiti tattao a maysa a lapped ti panagprogreso ti pagilian. Isu nga adu nga umili dagiti agtaltalinaed a napanglaw ken mapilitan a sumrek kadagiti illegal a trabaho ken pagsapulan kas ti panaglako ti illegal a droga ta awan ti sabali a mastrakenda a panggedan.

Saan a mailibak nga adu kadagiti kadagupan dagiti kandidato iti masungad nga eleksion ket naidarum wenno sumangsango kadagiti kaso mainaig iti kurapsion ken panagkunniber, aglalo kadagiti para senador, kongresista, gobernador ken mayor, a nabayagen wenno siguden nga opisial ti gobierno.

 Maaramidda ngata ni Presidente Duterte nga inaganan dagiti kurakot ken managkunniber a kapartiduan wenno kaaliadona iti politika a sumangsango iti kaso a graft and corruption, wenno plunder? Mapawilanna ngata ti anakna a ni Davao City Mayor Sarah Duterte a mangikamkampania kadagiti kandidato a namantiaan ti reputasionda iti kurapsion?

Iti sistema ti politika iti Pilipinas, nagbalinen a kadawyan kadagiti tradisional a politiko ti sumangsango kadagiti nagduduma a kaso, agraman ti graft and corruption, ta awan met ti linteg a mangipawil kadakuada iti panagkandidatoda.

Iti masungad nga eleksion, adda pay dagiti tallo a nalatak a sigud a senador a naidarum ken nabalud gapu iti plunder a kayatda ti agsubli iti Senado. No dagiti poll survey ti pagbasaran, nangatngato nga amang ti ranking dagitoy a politiko, ngem dagiti dadduma nga awan ti mantia ti integridad ken kabaelanda.

Nasayaat koma no addanto maputar a linteg, a mapawilan nga agkandidato dagiti sumangsango kadagiti kaso a kriminal tapno saanton a kasapulan dagiti listaan dagiti rinuker a politiko a mairakurak sakbay iti eleksion. No dagiti aplikante kadagiti nababa a posision iti gobierno ken pribado a kompania ket kasapulan dagiti adu a clearance ti “no derogatory record,” agbalin koma met a mandatory requirement dayta kadagiti agpanggep nga agbalin nga opisial ti gobierno.