CAOAYAN, Ilocos Sur – Impakaammo ti Municipal Social Welfare Office a dinalusanda ti listaan dagiti indigent a miembro ti PhilHealth ditoy nga ili.
Segun ken ni MSWD Officer Nancy Llanes, nagdalusda iti listaan gapu ta adda nakitada a nagdoble a nagan iti listaan ti National Household Targeting System ken dagiti inesponsoran ni First District Congressman Ryan Luis Singson a benepisario ti PhilHealth.
Kinuna ni Llanes a nasuktan kadagiti baro nga indigent a miembro dagiti naikkat a nagdoble a nagan.
Kinuna ti MSW officer a nagbalinen a 300 ti sigud a 223 a pamilia nga inesponsoran ti munisipio kas paset ti programa ni Mayor Germy S. Goulart a mapalawa ti serbisio ti PHilhealth iti Caoayan. Gapu iti daytoy, agdagup itan iti 1,705 dagiti indigent a miembro ti Philhealth iti daytoy nga ili, pakairamanan ti 602 nga inesponsoran ni Congressman Singson ken 803 manipud iti national government.#
