Live-in partners, nakasuan iti panaglabsing iti RA 9165

STA. MARIA, Ilocos Sur – Pinilaan ti kapolisan ditoy iti kaso a panaglabsing iti RA 9165 ti agkalib-in a nakumpiskaanda iti droga ken ramramit-droga iti insayangkatda a search operation iti pagtaengan dagitoy sadiay Barangay Poblacion Norte ditoy nga ili idi malem ti Hulio 8.

Naipaiman iti opisina ti provincial prosecutor, Vigan City, ti kaso a panaglabsing kontra iti Section 11 ken 12 ti Article II ti RA 9165 maikontra kada Rommel Concepcion y Carrido, 48, ken ni Mylene Gizela Costales y Rivera, 34, agpada a residente iti nadakamat a barangay.

Nakakumpiska dagiti polis bayat ti panagsukisokda iti balay dagiti suspek iti siam a plastic sachet a naglaon iti mapapati a shabu, 2 improvised burner, maysa nga improvised totter, lighter, getteng ken digital weighing scale, ken pakete ti awan naggianna a plastic sachet.

Karaman dagiti dua iti PDEA target list ken watch list nga agiwaywayat kadagiti aktibidad mainaig iti illegal a droga.#