Loan collector, hinold-ap armado a lallaki

TAGUDIN, Ilocos Sur – Sumangsango pay laeng dagiti otoridad iti blangko a pader mainaig iti pannakahold-ap ti maysa a loan collector sadiay Barangay Sawat Junction ditoy nga ili idi agtapus ti bulan ti Pebrero.

Segun iti polis, awan pay ti pakabigbigan dagiti armado a lallaki a nanghold-ap ken ni Ronnie Garcia y Bagangao, 33, naasawaan, loan collector ti Suyo Multipurpose Cooperative ken residente iti Sitio Lub-ong, Barangay Poblacion, Suyo, Ilocos Sur.

Idi Pebrero 28, nahold-ap ni Garcia bayat ti panagdaliasatna iti asideg ti karayan iti Barangay Sawat Junction, Tagudin, Ilocos Sur ket intaray dagiti mannanakaw ti koleksionna nga agdagup iti P53,000.00.

Iti panagimbestiga dagiti polis, kagapgapu ni Garcia iti Barangay Pacac, Tagudin, Ilocos Sur ket bayat ti ilalasatna iti igid ti karayan a nakalugan iti motorsiklona a Honda, kellaat a nagparang ti dua a lalaki a nagaruat iti nangisit a bonete ket sinerreganda ti dalanna.

Maysa kadagiti suspek ti nangpaturong iti paltog ken ni Garcia sada inulod daytoy ken ti luganna iti nasamek a paset ti karayan.

Ginammatan ti maysa kadagiti suspek ti shoulder bag ni Garcia a nakaikabilan ti kuarta, sada pinarautan dagiti imana iti barut ken sinelselan ti ngiwatna iti tualia.

Naglibas dagiti suspek iti direksion ti Barangay Sawat.

Nangisayangkat dagiti polis Tagudin iti hot pursuit operation kalpasan a nagpatulong ti biktima a kinuyog ni Barangay Kagawad Diosdado Manzo ti Barangay Pudoc East ngem negatibo ti resultana.

Agtultuloy ti panagimbestiga dagiti polis mainaig iti nasao a panagtakaw.#