Lobo ti agsidsida iti kalding?

BADOC, Ilocos Norte – Sabali manen a kalding ti sinda ti mapapati a dakkel nga ayup sadiay Barangay Saud idi parbangon ti Enero 31.

Naireport iti polis ditoy nga ili a dua manen a kalding a naiwayway iti kataltalonan ditoy a barangay ti mapapati nga inatake ti di pay ammo no ania ti kitana nga ayup ket winakwakanna ti boksit ti maysa sana sinda ti lalaem daytoy.

Nagandat met a mawakwak ti boksit ti sabali a kalding ngem saan a napakaruan.

Agtultuloy ti panagimbestiga dagiti polis mainaig iti daytoy kaudian a misterioso a pannakapapatay ti kalding ditoy nga ili.

Agingga iti pannakaisurat daytoy, di pay ammo no ania a klase nga ayup ti agsidsida kadagiti immuna a napapatay a kalding.#