Local transmission ti Covid-19 iti Ilocos Sur, nakompirmaran

VIGAN CITY — Addan local transmission iti Coronavirus disease 2019 iti Ilocos Sur kas ipakita ti kellaat a yaadu ti bilang dagiti nagpositibo iti daytoy a virus iti nagsasaruno nga aldaw ket kasapulan ti ad-adda a panagannad ken panagtungpal kadagiti nayetnag a health protocols ken pagannurotan.

Dayta ti nakompirmaran ti media kabayatan ti naangay a Covid-19 update iti Provincial Action Center nga idauluan ni Governor Ryan Luis Singson.

Naammuan a manipud iti single digit a bilang dagiti Covid-19 positive, ket kellaat a timmayok ti bilangda kadagiti naglabas nga aldaw kalpasan a naiparuar ti resulta dagiti naisayangkat a swab test kadagiti naka-quarantine nga addaan iti “close contact” kadagiti immun-una a nagpositibo iti virus, ken dagiti nagawid iti Ilocos Sur a local stranded invidual (LSI), returning Filipinos (ROF) ken authorized person outside residence (APOR).

Impakaammo ni Gov. Singson a gapu ti kellaat ken agtultuloy a yaadu ti bilang dagiti nagpositibo iti Covid-19 ket iti umuna a dua a lawas ti Hulio ket saan pay laeng nga agpastrek ti Ilocos Sur kadagiti agawid nga LSI ken ROF ta napunnon dagiti Covid-19 isolation facilities ti Provincial Government hospitals ken dagiti quarantine facilities kadagiti local government units.

Impaganetgetda nga agawatto met laeng ti Ilocos Sur kadagiti LSI ken ROF ngem urayenda nga adda dagiti agbakante ken kalpasan a ma-disenfect dagiti pasilidad tapno nataltalged dagiti umili. Kiniddawna kadagiti agplanplano nga agawid iti Ilocos Sur a maki-coordinate-da a nasayaat kadagiti akinsakup kadakuada nga LGU tapno naan-annayas ken nataltalged ti panagsublida iti Ilocos Sur ken panagdalanda iti 14 nga aldaw a quarantine period.

Immandarna payen ti pannakapainget ti pannakaipakat dagiti pagannurotan ken health protocols kadagiti border checkpoints ti probinsia nangruna sadiay ili ti Tagudin a nagbedngan ti Ilocos Sur ken La Union. Sakbayna, immandarnan ti nainget a pannakaipakat ti curfew kadagiti border checkpoints manipud iti alas-10 iti rabii agingga iti alas-5 iti bigat tapno malapdan dagiti saan nga importante a panagdaliasat dagiti tattao, ken iseserrek iti Ilocos Sur dagiti saan nga awtorisado a tattao.

Nagangayanna, kadagiti naglabas nga aldaw, nagatiddog ti pila dagiti lugan iti border checkpoint sadiay Tagudin a dimmanon idiay Sudipen, La Union gapu ti nainget a panagsitar ken panangkontrol dagiti agbambantay kadagiti sumrek iti probinsia.  

Minitingen ni Gov. Singson dagiti local chief executives dagiti ili ken siudad ti Ilocos Sur, ket natinong ti kaaduan ti panangkiddawda iti Inter-Agency Task Force on the Emerging Infectious Disease para ti pannakaideklarar ti Ilocos Sur ita Agosto 1 – 15, 2020 nga agdalan iti modified enhanced community quarantine manipud iti medium-risk general community quarantine.

Nagapila ni Gov. Singson kadagiti umili ti panagtudio ken panangsurotda kadagiti nayetnag a pagannurotan, ti panagtalinaed kadagiti pagtaenganda dagiti tattao nga awan ti napateg nga aramidenda iti ruar. Indariragna ti panagtungpalda kadagiti health protocols kas ti panagaruat ti facemask, social distancing ken proper hygiene tapno malapdan ti panagraira ti virus. Kabayatan ti pannakasursurat daytoy a damag ket addaan iti kadagupan a 44 a positibo ti Covid-19 manipud kadagiti nagduduma nga ili ken siudad ti Ilocos Sur.

Mairaman kadagiti nagpositibo ket nagawid nga LSI, ROF ken APOR nga addaan iti “travel history” manipud National Capital Region wenno iti ballasiw-taaw. Maibilang met a naakaran dagiti umili nga awanan iti travel history iti ruar ti probinsia ngem naaddaanda iti “close contact” kadagiti immun-una a nagpositibo iti virus.

Iti kaadu ti bilang dagiti “active case” ket posible a mangparnuay iti nayon a local transmission no saan nga agannad ken sumurot kadagiti pagannurotan dagiti umili ti Ilocos Sur.