CAOAYAN, Ilocos Sur – Mangipaay ti lokal a gobierno iti taraknen a baboy kas livelihood project dagiti mapili a residente ditoy nangruna dagiti marigrigat a pamilia .
Kinuna ni ABC President Dr. Teresa Alquiza nga impalgak ni Mayor Germelina Singson-Goulart bayat ti miting dagiti barangay captains ti plano ti lokal a gobierno a mangipaay iti daytoy a livelihood project kadagiti marigrigat a residente ditoy nga ili.
Segun iti nasao nga opisial, dua a resipiente tunggal barangay ti maikkan iti saglilima a burias a taraknenda ken 25 sako a feeds a pagpakanda agingga iti mabalinen nga ilako dagitoy.
Innayon ni Alquiza a no nalakon ti resipiente dagiti baboy, isublina ti puonan iti LGU tapno maited daytoy iti sabali a resipiente ngem kukuanan ti maganansia.
Naikiddaw kadagiti barangay captains ti panangkitada kadagiti resipiente a pakayawatan ti proyekto ngem kasapulan a makapasa daytoy kadagiti requirement kas iti lokasion ti pagtaraknanda iti baboy tapno saan nga agsagaba dagiti kalugaranda iti angot manipud iti rugit dagiti baboy.#