Lola, biniktima ti Budol-Budol Gang

LAOAG CITY – Dika agtaltalek kadagiti agpampammarang a kabagian amangan no kamengda iti Budol-Budol Gang.

Maysa a baket ti nabiktima babaen daytoy a gunglo itay nabiit a nakapukawan ti iduldulinna a kuarta.

Iti pulongna iti polis, kinuna ti  di nainaganan a biktima a dua a babbai ti napan iti balayna idi Mayo 5 ket inyam-ammoda ti bagida a kabagian ti baket.

Nasurok a tallo a lawas a naggian dagitoy a babbai a nabigbig a maysa a Maria Cristina Domingo ken maysa nga Andie a mapapati a taga-Bulacan ket nagtalek ti baket kadakuada agsipud ta tunggal sumangpetda, adda pasaraboda a makmakan ken inggatanganda pay ti baket iti pagiddaan.

Segun iti biktima, rimmuar dagiti suspek idi Mayo 27 ket saandan a nagsubli pay.

Naduktalan laengen ti baket nga awanen ti P50,000.00 nga iduldulinna.#