Lolo a nagpaputok, tiniliw dagiti polis

CANDON, ILOCOS SUR – Kinemmeg dagiti polis iti daytoy nga ili ti maysa a lolo a nagpaputok iti paltogna iti panagkasangay ti apokona.

Binigbig ni hepe iti Candon City  Police Station PSupt. Richmond L  Tadina ti suspek  nga isu ni Jovencio Toquero y Gabuat, edad 57, addaan asawa ken agnaed iti Brgy. Talogtog itoy a siudad.

Segun iti polis, maysa a report ti dimmanon iti opisinada nga adda nagpaputok iti paltog idiay Barangay Talogtog, partikular iti balay ni Jovencio Toquero y Gabuat, edad 57, addaan asawa.

Nagresponde dagiti polis iti nasao a lugar ket nadanonda ti grupo dagiti lallaki nga agiinom iti sango ti balay ni Toquero.

Inadmitir ti suspek nga isu ti nagpaputok kas selebrasion iti panagkasangay ti apokona..

Kinumpiskar dagiti polis ti paltog ni Toquero a nakasabbikel iti siketna – maysa a lisensiado a cal. 45 Colt 1911 nga addaan serial number 617576 nga addaan maysa a magasin a nagkarga iti 3 a bala.

Nakasarak pay dagiti polis iti dua a kapsula a nagtaud iti nasao a paltog.

Maisagsagana ti darum kontra iti suspek.#