Footer

Lolo ken lola, immawatda iti P500 manipud katas ng VAT

VIGAN CITY – Napia la nga
igatangda iti agas ken taraon.







Daytoy ti kaadduan nga insungbat
da lolo ken lola idi madamag no pangiserbianda iti P500 nga inawatda
a regalo manipud iti “Katas ng VAT: Tulong kada Lolo ken Lola” ti
agdama nga administrasion.

Kinuna ni Nana Floring, 70, nga
igatangna iti agas ken bitaminana ti naawatna a kantidad.

Segun met ken ni Nana Marcelina,
84, igatangna ti kagudua ti inawatna a kuarta para iti kape ken ti
nabati para iti bagas.

Siraragsak met ni Nana Ising, 72,
a nagkuna nga itedna ti kagudua iti anakna tapno gumatang iti
sangakilo a karne ti baboy ken dadduma pay a kasapulanda nga
agkakabbalay ken idulinna ti nabati tapno adda in-inutenna nga
igatang iti agasna.

Manipud apaglabes nga ala una
agingga iti sumipnget ti Enero 13, inanusan dagiti sumurok-kumurang
1,800 a senior citizens nga agtawen iti 70 agpangato ti naguray tapno
awatenda ti nasao a gatad manipud kadagiti empleado ti Department of
Social Welfare and Development Region-I.

Alas dose pay laeng,
masarsarutsoten ti panagsangpet dagiti senior citizens iti gymnasium
iti daya ti Mini bus terminal.

Adda pay dagiti nakasarukod ken
ak-akayen dagiti kabagianda. Adda pay dagiti arig didan makita ti
dalanenda.

Ngem iti baet ti naunday a
panagurayda, nailadawan iti rupada ti ragsak a naggawid kalpasan nga
inawatda iti P500.

Nupay kasta, adda dagiti senior
citizens a naggawid nga ima-ima gapu ta saanda a nairaman iti
listaan.

Adda pay dagiti apaglabes la iti
60 ti tawenda ngem immayda latta bareng no maikkanda iti P500.

Nakigasanggasatkami
bareng maikkankami ngem awan,” uppapay a kinuna ni Nana Cion.

Mismo a dagiti empleado ti
Department of Social Welfare and Development ti Region I ti nagiwaras
iti nasao a gatad kadagiti senior citizens babaen ti panangbayabay
kadakuada dagiti empleado ti Vigan City babaen ti panangidaulo ni
CSWD officer Cely Agcamaran.

Pinunduan ti gobierno nasional
daytoy maminsan laeng a cash subsidy a P500 para kadagiti senior
citizens nga agtawen iti 70 ken maibilang iti pamilia nga adda iti
baba ti poverty threshold ken saan nga agpenpension iti Social
Security System (SSS), Philippine Veterans Affairs Office (PVAO)wenno
Government Service Insurance System (GSIS).#