Lolo, naimbestiga gapu iti mulana a marihuana

SANTIAGO, Ilocos Sur – Uray no lolo, saan a santuen ti linteg no nagsalungasing.

Napaayaban ni Laurentino Angaangan, 72, naasawaan, residente ti Caburao ditoy, iti police station ket naimbestigar kalpasan a naduktalan ti kaadda ti maysa a puon ti marihuana iti likudan ti pagtaraknanna iti baboy.

Maysa a tawag iti telepono ti naawat ti polis ditoy a nangireport iti nakitada a mula a marihuana iti likudan ti piggery ni Angaangan.

Nagturong dagiti polis iti nasao a lugar ket pinag-otda ti maysa a kapuon a marihuana a mapattapatta nga agtayag iti walo kadapan, agdagsen iti tallo kilo ken agpateg iti P4,500.#