Love triangle makitkita a motibo pannakapapatay tricycle driver, high school student

MAGSINGAL, Ilocos Sur – Love triangle ti kitkitaen dagiti inbestigador a motibo ti pannakapapatay ti maysa a tricycle driver ken high school student iti provincial road a sakup ti Barangay Manzante ditoy idi rabii ti Oktubre 17.

Kasta met a palpalutpoten dagiti polis no ania ti pakainaigan ti maysa a Peter Ottley, taga-Alangan, Magsingal, Ilocos Sur a pimmanaw iti lugarda ken  saanen a mabirokan pay kalpasan ti pannakapasamak ti pammapatay.

Iti pannakipatang dagiti polis iti pamilia dagiti biktima para iti pannakasolbar ti pammapatay, impeksa dagitoy ti saanda pay a panagsao agingga a maidulinda pay dagiti biktima.

Impatalged dagiti pamilia ti biktima a sadanto makipartisipar iti pannakarisut ti kaso kalpasan ti pamunpon.

Maipalagip a napapatay da Winston Alvarez y Pichay, 37, naasawaan, tricycle driver; ken Markee Tayaba y Tabuno, 17, baro, 4th year high school idinto a nasugatan ti makannigid a pungupunguan ni Jetli Alvarez y Milanay, 12, Grade VI pupil, agpapada a residente iti Barangay Manzante, Magsingal,  iti barangay road a sakup ti barangayda idi agarup 9:10 ti rabii ti Oktubre 17.

Saan a nabigbig ti suspek iti pammapatay.#