LTFRB Chairman: PUV franchise is free and not for sale

VIGAN CITY — Libre ken saan a mailako dagiti prangkisa ti public utility vehicle ket rumbeng a maipaay daytoy kadagiti kualipikado nga operator tapno maserbian dagiti umad-adu a commuters iti Region I nangruna iti Ilocos Sur.

Dayta ti impaganetget ni Land Transportation Franchising and Regulatory Board Chairman Martin Delgra III kabayatan ti panagsaritana iti ababa a programa sakbay ti pannakayawat ti prangkisa dagiti 30 a taxi nga ag-operate iti Vigan City ken Laoag City. Naaramid ti programa iti sango ti Provincial Capitol, Vigan City idi bigat ti Agosto 28, 2019.

Nagatender iti pasken da Vice Gov. Jeremias Singson, SPM Mildred Elaydo a Chairperson ti Committee on Transportation iti Provincial Board, SPM Efren Rafanan, Sr. ken dadduma pay nga opisial ti lokal a gobierno iti Vigan City, Laoag City ken Bantay, Ilocos Sur. Dimmar-ay pay dagiti opisial ti LTFRB Region 1 Office ken pannakabagi ti Ilocos Transport Cooperative ken Troy Darren Express.

Iti pakabuklan ti mensahe ni Chairman Delgra, sinalaysayna a manipud idi dinutokan ni Presidente Rodrigo Duterte idi Hulio 2016 a mangidaulo ti LTFRB ket maysa kadagiti kangrunaan a nadanonna a nadagsen a problema ket ti kurapsion iti ahensia pakairamanan ti Region I gapu ta saan a nanayonan dagiti prangkisa ti PUV iti adu a tawen, ken adda dagiti nailako a peke a prangkisa kadagiti operators a nagrairaan dagiti adu a kolorum a pampasahero a behikulo.

Inlawlawagna a rumbeng a no umadu dagiti tattao iti maysa a lugar ket nasken a manayonan met dagiti lehitimo a pampasahero a pagluganan, ngem saan a nanayonan dagiti naiparuar a prangkisa iti adu a tawen gapu iti kurapsion.

Impaganetgetna a dagiti prangkisa ket libre ken saan a rumbeng a mailako kadagiti operator. Impalgakna ti tarigagayna a mapaksiat ti kurapsion iti LTFRB agingga nga aggibus ti termino ni Presidente Duterte. Impasingkedna ti nasayaat a serbisio ti LTFRB ken pannakaiparuar iti masakbayan dagiti prangkisa dagiti PUV para iti Ilocos Sur tapno masulosionan ti problema ti pampasahero a behikulo iti probinsia.

Iti met panagsarita ni Vice Gov. Singson, impeksana ti ayatna iti kaaddan ti taksi iti Vigan City a di un-unana ket kalesa laeng ti pannakataksi dagiti agindeg. Impaganetgetna a simbolo ti panagdur-as ti kaaddan dagiti taksi iti maysa a lugar. Impeksana ti tarigagay ti Provincial Government a panagdur-as ti siudad ken sibubukel a probinsia nga agkasapulan iti ad-adunto a taksi ken dadduma pay a pampasahero a lugan.

Imbasa met ni SPM Elaydo ti mensahe ni Gov. Ryan Singson a nangipeksaan ti gobernador ti ayat ken ragsakna iti kaaddan ti operasion ti taksi iti Ilocos Sur a simbolo ti panagprogreso. Impalgakna ti kinapateg ti operasion dagiti taksi tapno adda natalged ken komportable a pagluganan dagiti tattao nangruna dagiti adu a turista.

Iti paggibusan ti programa, inyawat ni Chairman Delgra dagiti dokumento ti prangkisa kadagiti pannakabagi dagiti operators. Naaramid ti ribbon cutting para iti taxi service ken ceremonial ride dagiti opisial ti gobierno iti sentro ti siudad. Kalpasanna, naisayangkat ti calibration dagiti metro ti taksi tapno makapagpasadadan. Naaramid pay ti dialogo iti nagbaetan ti LTFRB Chairman ken dagiti opisial ti Provincial Government ken stakeholders iti transportation sector iti Ilocos Sur.

Adda 15 a unit ti taksi a naikkan ti prangkisa nga agbiahe iti Vigan agingga iti intero a Region 1, ken lima a coaster nga addaan iti rota a Vigan–Santa Cruz. Adda pay 15 met a taksi a naikkan iti prangkisa nga agbiahe sadiay Laoag City ken intero a Region 1.●