Lucero slay, adda pakainaigan ti droga?

VIGAN CITY – Droga ti maysa nga anggulo a kitkitaen dagiti inbestigador mainaig iti pannakapapatay ti maysa a lalaki iti Jose Singson Street, Barangay VIII ditoy siudad idi agarup 12:30 ti bigat ti Nobiembre 4.

Dead on arrival iti Gabriela Silang General Hospital ni Dutchy Lucero y Torricer, 37, naasawaan, ken residente iti Sitio Mindoro, Barangay San Sebastian, San Vicente, Ilocos Sur kalpasan a pinaltogan ti armado a lalaki iti asideg ti paglakuan ti balut iti Jose Singson Street idi agarup 12:26 ti bigat ti nadakamat a petsa.

Impatay ni Lucero ti sugatna iti ulo a nagtaud iti cal. 45.

Ngem segun iti maysa a saksi, sakbay ti pammaltog, sinardengan ti dua a lalaki a naglugan iti motorsiklo ni Lucero a nakatakder iti asideg ti paglakuan ti balut ket kinapatang ti maysa kadagiti suspek ti biktima.

Kinuna ti saksi a babai ti birbiroken dagiti suspek ket maysa a numero ti mapapati nga iyaw-awat ti biktima idi pinaltogan ti suspek iti sumagmamano a beses.

Naglibas dagiti suspek a nagkasakay iti motorsiklo iti amianan a direksion.

Timmulong ti Ilocos Sur SOCO a nagimbestiga iti nasao a pammapatay ket nakarekobreda iti tallo a kapsula manipud iti cal. 45 iti nakapasamakan ti krimen.

Ngem limtuad iti panagimbestiga dagiti polis a sakbay ti pannakapaltogna, naggapu ni Lucero iti Barangay 9, partikular iti balay ti maysa a Ryan Ferido y Flores, 26, a nangbirbirokanna iti kalib-inna.

Kasta met a mapapati a nainbolbar ti biktima iti illegal nga aktibidad iti kallabes.

Iti interbio ni Police Supt. Jugith del Prado iti maysa a lokal a radio station ditoy, kinunana nga iti follow-up investigation ti polis mainaig iti pannakapapatay ni Lucero, tallo a lalaki ti naapput a madama ti pot sessionda sadiay Barangay 9 iti uneg ti pagtaengan ni Ferido.

Malaksid ken ni Ferido, nainaganan dagiti dua a kakaduana a ni Denver Galvarez Asuncion, 18, baro, residente iti Brgy 7, Vigan City, Ilocos Sur; ken Ferdinand Mariano Aspa, 21, baro, ken residente iti Barangay 8, Vigan City.

Kinuna ni Del Prado a kitkitaenda pay no adda pakainaigan dagiti napalabas nga aktibidad a mapapati a nakainbolbaran ni Lucero iti pannakapapatayna.#