Lugan a nagkarga iti narra a ridaw, nasalamaan dagiti polis

CANDON CITY – Nasalamaan dagiti polis ditoy ti maysa nga Isuzu Elf a nagkarga iti di pay nalpas a rikep ti ruangan iti national highway ditoy siudad iti parbangon ti Disiembre 14.

Agpatpatrolia dagiti polis iti national highway a sakup ti Barangay Oaig Daya, idi masalamaanda ti agpaabagatan a nalabaga nga Isuzu Elf a minaneho ni Ronald Dave Belleza y Billedo, 36, naasawaan, residente iti Barangay Lusuac, Peñarrubia, Abra a nagkarga dagiti rikep ti ruangan a narra.

Inako ni Prospero C. Colet ti Tumalip, Licuan-Baay, Abra nga isu ti akinkukua kadagiti nasao a rikep ngem naduktalan dagiti polis a suspetsoso ti dokumento nga impakitana agsipud ta naipigket laeng ti logo ti CENRO-Lagangilang, Abra ken nabalbaliwan ti sertipikasion a naggapu iti opisina ti mayor ti nadakamat nga ili. Gapu itoy,  naipan iti polis station da Belleza ken ni Colet agraman ti lugan ken ti kargamento daytoy nga agdagup iti 62 pedaso a rikep nga agduduma ti rukodda.#