Lugan a nagkarga iti oversized a baboy, napasardeng nga agbiahe iti checkpoint

SAN ESTEBAN, Ilocos Sur – Iti sanguanan ti mapapati a panagkisang dagiti maparti a baboy iti probinsia,  maysa a lugan ti napasardeng iti checkpoint idi malem ti Hulio 10 gapu ta nagkarga kadagiti oversized a baboy.

Sakbayna, dagus a nangipasdek iti checkpoint ti polis nga indauluan ni Police Inspector Joel M. Castillo, acting chief of police, iti Barangay Poblacion ditoy nga ili idi nakaawatda iti report manipud ken ni Police Senior Inspector Pedro Barbado, OIC ti Santiago Municipal Police Station, a naispatanda ti maysa a maroon nga Isuzu Elf a napaspas ti tarayna nga agpaamianan a direksion.

Pinasardeng dagiti polis ti Isuzu Elf, addaan plaka nga XKS 327, a minaneho ni Gerardo Ascor y dela Cruz, 35, naasawaan, ken residente iti Barangay Capangpangan, Vigan City sada sinukimat daytoy ket naduktalanda a nagkarga iti 13 nga oversized a baboy.

Malaksid iti drayber, tallo a pahinante ti nakita dagiti polis iti uneg ti lugan a pakairamanan da Christopher Gonzales y Binaviz, 22, naasawaan; Omar Piano y Aspa, 37; ken Edwin Bilgera y Rabon, agpapada amin a residente iti Barangay Capangpangan.

Nairehistro Isu Elf iti nagan ni Medardo Gonzales ti Barangay Capangpangan.

Awan ti naipakita ti drayber a permit a maibiahe dagiti baboy manipud iti point of origin agingga iti destinasionna ken awan ti resibo manipud iti Opisina ti  Animal Quarantine a nakabase iti Barangay Bio, Tagudin, Ilocos Sur.

Segun ken ni Ascor, nailugan dagiti baboy iti Barangay Libtong, Tagudin, Ilocos Sur ket mapapati a kukua ti maysa a Gerardo Oandasan iti Badoc, Ilocos Norte.

Naipaima ti behikulo agraman dagiti kargana a baboy ken ni Godfrey Abrero, Animal Quarantine Officer, PSI Eliseo Laiz, Assistant Quarantine Officer ken Angelito Albumeto, pannakabagi dagiti hog raisers, para iti umisu a disposision.

Saan laeng a daytoy ti gundaway a nasukalan daytoy a lugan  a nagibiahe iti baboy ditoy probinsia.

Idi Hunio 16, saan a pinagtuloy dagiti polis nga agbiahe ti maysa nga Isuzu Elf, addaan iti license plate number XKD 327, idi naduktalanda a nagkarga daytoy iti walo a kapon a baboy ken awan ti maipakita ti drayber a nainaganan Gerardo Aslor y Dela Cruz, naasawaan, ken residente iti Barangay Capangpangan, Vigan City a dokumento mainaig iti pannakaibiahe dagiti nasao a baboy ken pammaneknek a limmasat iti inspeksion iti quarantine sadiay Barangay Bio, Tagudin.

Na-impound ti nasao a lugan bayat nga awan ti naipakita ni Aslor a maitutop a dokumento ti pannakaibiahe dagiti baboy.

Nagreklamo dagiti meat vendors ken ni Gov. Luis “Chavit” Singson a nakisang ti magatang a baboy iti probinsia manipud iti nangipaulog ti gobernador iti Executive Order a mangiparit iti pannakaiserrek ti oversized a baboy iti probinsia.

Ngem ipetpetteng dagiti hog raisers nga adda umdas a suplay ti baboy iti probinsia ket no agsursor laeng dagiti meat vendors, adda magatangda.

Napagtinongan iti maysa a dialogo iti nagbaetan dagiti dua a grupo a P110 kada kilo ti presio ti liveweight a baboy ngem kasapulan a saan a nalaglag-an ngem 85 kilos.#