Lugan, motorsiklo, nagdinnungpar

SANTIAGO, Ilocos Sur.  Nagsagrap iti sugat iti nadumaduma a paset ti bagina ti maysa a baro idi aksidente a dinungpar ti maysa a lugan ti motorsiklona iti Barangay Bigbiga ditoy.

Dinungpar ti Isusu Crosswind, addaan plaka XRS-321 a minaneho ni Romeo de Lana, 56, residente iti Laoac Dacanay, Tayug, Pangasinan, ti Euro motorcycle a minaneho ni Christian Calma, 21,, residente iti barangay San Jose, Candon City bayat ti panagdaliasatda iti nasao a barangay ditoy.

Segun iti inbestigasion ti polis, agturturong ni Calma iti abagatan idinto nga agpaamianan ti Crosswind idi mapapati a naawanan iti kontrol ti Crosswind ket ditan a nadungparna ti motorsiklo a nagluganan ti biktima.

Ginuyod pay ti Crosswind ti motorsiklo iti agarup 17 a metro manipud iti point of impact.

Naitaray iti ospital ni Calma gapu iti nakaro a sugatna.#