Lugan a nagkarga narugos nga akasia, nasalamaan dagiti polis

SAN JUAN, Ilocos Sur – Maysa a lugan a nagkarga kadagiti naragadi nga akasia ti nasalamaan dagiti polis bayat ti panagpatroliada iti Barangay Immayos Norte ditoy nga ili idi sardam ti Agosto 4.

Kinuna ti polis a bayat ti panagisayangkatda iti mobile patroling iti national highway, partikular iti sakup ti Barangay Immayos Norte, idi agarup 7:50 ti sardam ti nadakamat nga aldaw, nasalamaanda ti maysa nga Isuzu Elf a minaneho ni Ruben Ramos y Ranches, 50, baro, mannalon, ken residente iti Barangay Labnig, ditoy met laeng nga ili, a nagkarga kadagiti acacia logs.

Awan ti naipakita ni Ramos a permit wenno dokumento a mapukan ken maibiahe dagiti acacia logs isu nga impan dagiti polis ti drayber ken ti luganna iti police station para iti pannakainbestigana.

Impudno ni Ramos a da Armando Talla y Erese, ken Salvador Villamar y Talla, 45, agpada a residente iti Barangay Malamin, San Juan dagiti nanggatang ken nagparagadi kadagiti akasia ket nabaon laeng a mangibiahe kadagitoy manipud iti Barangay Barbar agingga iti San Vicente, Ilocos Sur.#