Lugan a nagkarga oversized a baboy, sinaed dagiti polis

SINAIT, Ilocos Sur – Kas iti Barangay Bio,Tagudin, adda met natakuatan dagiti agipuspuslit iti baboy iti Ilocos Sur a pang-likawanda tapno saanda a dumalan iti quarantine check-point iti Barangay Tapao, Sinait, Ilocos Sur.

Ngem malasda ta nasiputan ida dagiti tanod iti Barangay Dadalaquiten Norte ket intimbreda kadagiti polis a dagus a nangipasdek iti checkpoint iti Barangay Baliw ditoy met la nga ili a nagtungpal iti pannakatiliw dagiti suspek.

Iti report manipud iti polis ditoy, maysa a lugan a nagkarga iti lima nga oversized a baboy a manipud iti probinsia ti Ilocos Norte a naipuslit a maideliber iti San Vicente, Ilocos Sur ti saan a nakalusot iti checkpoint nga impasdekda iti Barangay Baliw ditoy nga ili idi Agosto 31.

Segun ken ni Police Senior Inspector Arsenio Ramos, hepe ti polis ditoy, saan a nagna ti lugan iti Barangay Tapao a yan ti quarantine checkpoint no di ket naglikaw iti Barangay Dadalaquiten Norte ngem nakita dagiti tanod ti lugan ket ntawagda iti polis.

Dagus a nagresponde dagiti polis ket nangipasdekda iti checkpoint iti Barangay Baliw ket ditoy ti nangsaadanda iti Isuzu Elf.

Iti panangsukimat dagiti polis iti lugan, natakuatanda a nagkarga daytoy iti lima nga oversized a baboy a nagatang iti probinsia ti Ilocos Norte ket mapapati a maideliber iti San Vicente, Ilocos Sur.

Nabigbig dagiti pasahero ti Isuzu Elf a da Joemar Domingo y Villacillo, 29, drayber ken residente iti Brgy. 30, Baoa West, Batac, Ilocos Norte; ken Jeffrey Raping Y Pilot, 30, meat vendor, residente ti Bayubay Norte, San Vicente, Ilocos Sur.

Kinuna dagiti suspek a ni Ronaldo Rojo y Pilot, 32, meat handler, ken  residente met laeng iti Brgy. Bayubay Norte, San Vicente, ILocos Sur ti akinkukua kadagiti oversized a baboy.

Naipaima dagiti suspek ken ni Ruben Saulo Gandalera, quarantine oficer on duty a nakabase iti Barangay Tapao para iti umno a dokumentasion ken disposision.

Maipatpatungpal iti probinsia ti pammilin ni Gov. (idi) Luis “Chavit” Singson a maiparit ti pannakaiserrek dagiti oversized a baboy tapno masalakniban ti hog industry ken malapdan ti iseserrek dagiti sakit ti dingnguen manipud kadagiti sabali a probinsia.#