Footer

Lugan ti dati a mayor, naubor

SANTA, Ilocos Sur – Inubor ti uppat a lalaki ti lugan ti dati a mayor ti Vigan City bayat ti panagdaliasatna iti maysa a barangay a sakup daytoy nga ili.

Segun iti report a dimmanon iti polis, nabato ti akinlikud a bakrang ti kotse ni dati a Mayor ti Vigan City Ferdinand Medina a nakairamanan a nabuong ti sarming bayat ti panagpaabagatan ti lugan a minaneho ni George Arce, 51, naasaawaan, residente iti Barangay VI, Vigan City, iti national highway a sakup ti Mabilbila Norte ditoy nga ili.

Pinidut dagiti nagresponde a polis da Frederick Bigornia, 18, baro; Freddie Bigornia, 18, baro; Freddie Valla, 19, baro; ken maysa a di nainaganan a kaduada. Agpapada dagiti suspetsa a residente iti Barangay Manueva, ditoy met laeng nga ili.

Segun ken ni Arce, nakitana ti uppat a lallaki a magmagna iti igid ti makannigid a paset ti kalsada ket mapapati a maysa kadakuada ti pimmidut iti bato sana binarsak ti lugan.

Di nailanad iti report no adda a nakalugan ti dati a mayor iti kotse idi mapasamak ti panagubor.#